CAGAYAN DE ORO CITY – Gipaniguro sa Police Regional Office 10 nga dili mosipyat ang ipatuman nga kahugot sa seguridad sa Cagayan de Oro City Police Office/COCPO alang sa halos 60 ka kalihukan sa kapistahan sa patron Senior San Agustin sa syudad sa Agosto 28 ning tuiga.
Kini ang rason nga gipadal-an ni PRO 10 regional director Brig Gen Rolindo Suguilon sa 150 ka pulis gikan sa Kampo Alagar ang COCPO aron mopalig-on pa sa kahusay’g kalinaw sa dakbayan sa tibuok Agosto.
Miingon si COCPO deputy director for operations Lt Col. Jelesis Teves nga gawas sa 150 ka pulis gikan sa PRO 10 headquarters, mogamit usab sila sa siyam ka aerial drones aron masiguro ang pag-monitor sa mga dagkong kalihukan nga dagsaon sa katawhan ug mga bisita nga maki-piyesta sa dakbayan.
Hisayrang gitun-an pa sa COCPO kung angay ipaubos sa signal jamming ang mga linya sa telepono sa pipila ka dagkog fiesta activities ning syudad.
