CAGAYAN DE ORO CITY – Magpadala ang Police Regional Office 10 bisan usa ka libo ka pulis gikan sa Northern Mindanao aron lang masiguro ang kalinaw ug molampos sa ilusad nga October 13 Bangsamoro Autonomous Region in Muslim Mindanao (BARMM) parliament elections ning tuig.
Kasiguruhan kini ni PRO 10 regional director Police Brig Gen Jaysen De Guzman kung imando sa Philippine National Police (PNP) nga subling magpadala ang rehiyon sa dugang puwersa para pinakaunang parliament elections sa BARMM.
Gibutyag ni De Guzman nga wala kanila ang pagbalibad apan mangita’g mga paagi aron mahatagan ang kagustuhan sa katawhan nga nagkinahanglan sa igong seguridad sa taliabot nga piliay.
Namahayag ang heneral nga dili na bag-o nga matahasan sa PRO 10 tungod kay kanunay ang pagtubag nila sa ikaayo sa lugar.
Dumduman nga luwas nakabalik ang 400 ka pulis gikan sa PRO 10 nga nagsilbing special electoral board members sa Lanao del Sur diin pinakaunang higayon sa kasaysayan nga walay nahitabong ‘failure of elections’ niadtong Mayo 12.
