CAGAYAN DE ORO CITY – Pagkapapha sa katungdanan ang dangatan sa usa ka aktibong pulis kung mapamatud-an nga sad-an sa kasong grave misconduct nga gisang-at sa City Internal Affairs Service o CIAS ning syudad.
Kini ang panganti sa Police Regional Office 10 human sila dismayado nga laing pulis ang nalambigit sa seryoso nga pasangil diin giingong namusil-patay sa biktima nga police asset nga si Henry Pimentel sa Tangkungan,Sitio Pinikitan,Brgy Camaman-an sa dakbayan.
Gibutyag ni PRO 10 spokesperson Major Joann Navarro nga wala nila hilabti ang gihimong imbestigasyon ni CIAS chief Lt Col Henry Cay-as apan gihatagan sa igong panahon aron mapahigayon ang paspas nga imbestigasyon sa hitabo.
Kini tungod kay naghulat sila sa mahimong rekomendasyon sa imbestigasyon kung angay ba nga tangtangon o dili ang maong aktibong pulis nga nahinayka’g pusil ang biktima sa Lunes sa kadlawon.
Hisayrang gawas sa administratibong tulubagon, nag-atubang usab sa kasong murder ang suspek nga pulis sa piskalya nga gihandos sa Cogon Police Station sa miaging adlaw.
