Gihupay sa Police Regional Office 10 ang kabalaka sa mga ginikanan taliwala sa nahitabong in-campus shooting incident sa Zamboanga.Pinaagi sa pamahayag ni PRO-10 spokesperson Police Major Joann Navarro sa Bombo Radyo, gipasalig niini nga dili nila tugotan nga ang kahadlok ang makapugong sa pag-eskwela sa mga kabataan.
Tungod niini, nanawagan ang opisyal sa pakig-alayon sa komunidad ug uban pang law enforcement agencies aron dali nga ma-report ang mga kadudahang lihok sa palibot.
Gipasabot ni Navarro nga mas gihatagan karon og pagtagad sa PNP ang preventive nga bahin imbes nga maghulat pa nga may mahitabong trahedya.
Gihimug-atan usab sa maong opisyal nga maangkon lamang ang siguridad pinaagi sa pagkahiusa ug pagtinabangay sa matag usa.
