Mas gipahugot pa sa Police Regional Office 10 ang seguridad sa mga tulonghaan pinaagi sa mas hugot nga koordinasyon tali sa mga opisyal sa eskwelahan ug sa kapulisan ubos sa mando ni PNP Chief General Jose Melencio Nartatez nga gipatuman ni Regional Director PBGEN Christopher N. Abrahano.
Aron maandam ang tanan sa posibleng hulga, gitudlo sa maong opisyal ang pamaagi nga run, hide, and fight isip standard protocol alang sa mga estudyante ug magtutudlo kung adunay mahitabong insidente sa active shooting.
Lakip sa gipatuman nga mando ni General Nartatez ang pagtambong sa mga pulis sa matag flag raising ceremony kada Lunes aron masiguro ang presensya sa awtoridad sa mga campus samtang nagpadayon ang regular nga pagpatrolya.
Busa, giawhag ni PBGEN Abrahano ang publiko nga magpabiling mabinantayon ug mo-report dayon sa kapulisan kung adunay makit-an nga mga kadudahang panghitabo aron mapadayon ang kalinaw sa komunidad.
