CAGAYAN DE ORO CITY – Halos walay natala ang sobra 12-mil ka sakop sa government security forces nunot sa gipatuman nga full alert status sa Northern Mindanao region.
Kini human gitak-upan ang 2025 midterm elections nga walay dugu-on nga hitabo bisan sa mga lugar nga adunay gilauman nga init nga panag-ribal sa mga kandidato.
Gitumbok ni Police Regional Office 10 spokesperson Major Joann Navarro nga nakatala lang sa usa ka panagsumbagay tali duha sa ka political supporters ang ilang lower units gikan sa Lanao del Norte sa wala pa ang pagpahigayon sa piliay.
Gipasabot ni Navarro nga nalangan ang paglugwa sa maong kompirmasyon kay gipaubos pa sa subsob nga imbestigasyon ang sinumbagay sa isig-ka-suporters sa duha ka kandidato sa Lanao Norte nga natigayon niadtong May 6.
Gawas niini,wala na’y bisan unsa nga dugu-ong hitabo ang natala gawas lang sa robbery incident nga binuhatan sa unom ka suspek nga nadakpan ra usab sa kapolisan sa Kinoguitan,Misamis Oriental sa miaging Mayo 12 sa kadlawon.
Siya miingon nga mas taas pa ang election related incidents sa milabay’ng eleksyon sa kabarangayan ug kabatan-unan kay milista kini sa 15 ka itandi sa midterm polls nga usa lamang.
Kini ang hinungdan nga nagpasalamat pagdako si PRO 10 regional director Brig Gen Jaysen de Guzman sa tanang government agencies nga nalambigit sa preparasyon ug pagbantay sa eleksyon aron luwas ang katawhan.
