CAGAYAN DE ORO CITY – Walay pagdupa o pag-konsinte nga buhaton ang liderato sa Police Regional Office 10 batok sa pipila ka pulis nga ‘scalawags’ o naghimo’g mga kalihukang ilegal nga naglakip sa pagpakuyanap sa ilegal nga droga.
Kini ang reaksyon ni PRO 10 regional director Brig Gen Ricardo Layug Jr nunot sa hiniusang operasyon sa Philippine Drug Enforcement Agency 10 ug Cagayan de Oro City Police Office batok sa subli pagka-dakpan sa aktibong pulis nunot sa pasangil batok niini.
Miingon si Layug nga dili makatugot ang liderato sa Camp Alagar nga maguba ang standard integrity ug propesyonalismo sa kapolisan rason nga angay mapu-o ang pipila ka pulis nga naglambigit sa ilegal nga droga.
Maoy gitumbok sa heneral ang pagkadakpi sa 52 anyos nga si Police Staff Sargeant Santiago Lumangcas nga unang nadakpan sa PDEA operatives sulod sa iyang balay sa Barangay Lumbia sa dakbayan sa miaging adlaw.
Siya miingon nga dili magpanuko’g silot ang liderato sa Philippine National Police ngadto sa pipila ka pulis nga naghatag sa kadaot sa ilang propesyon.
Dumduman nga gisulti ni PDEA 10 regional director Atty. Benjamin Gaspi nga nadakpan nila si Lumangcas pinaagi sa entrapment operation diin nakompiskar ang 110 gramos nga gitoohang shabu balor 700-mil pesos.
Nabawi usab sa PDEA-PNP operatives ang walo ka kahon sa 5.56 mm live ammunitions, pito ka magazines nga dunay bala, Galil firearm with Serial No. 49307530 with PNP logo, Glock 17 Gen 4 with Serial No. PNP32114, Glock 17 magazine,tulo ka celphones ug drug paraphernalia.
Si Lumangcas ang una nang nadakpan NBI ug PDEA sa magkalahing higayon apan pulos nabasura ang illegal drug cases niini ayha nadakpa’g balik ning syudad sa miaging adlaw.
Gikasuhan sa pagsupak sa balaod pagbaligya’g ilegal nga droga ang suspek sa piskalya ning semanaha.
