CAGAYAN DE ORO CITY – Gidid-an ni acting Police Regional Office-10 Dir Bir Gen Rolando Anduyan ang tanang pulis nga modawat sa bisan unsa nga gikan sa illegal nga kalihukan.
Gihimo ni Anduyan ang mando dungan sa iyang pagdawat sa tahas nga gihatag kaniya ni PNP officer-in-charge Lt Gen Archie Gamboa sa Camp Alagar kagahapon sa buntag.
Miingon si Anduyan angay mabalik ang pagsalig sa publiko sa PNP ilabina nga sunod-sunod nga nabutang kini sa lain-laing iskandalo.
Si Anduyan nga taga-Iligan City ang gibutang ni Gamboa sa PRO-10 samtang gisilbihan ni Brig Gen Rafael Santiago Jr ang six months preventive suspension order epektibo ning semanaha.
