CAGAYAN DE ORO CITY – Miapelar si Police Regional Office 10 Director Brig Gen Jaysen De Guzman sa iyang mga pulis nga dili batikuson ang ilang kaugalingong organisasyon nga Philippine National Police o PNP.
Kini human nabutang sa kontrobersya ang PNP sa pagdakop kang kanhi Pres Rodrigo Duterte nga maoy gisugo sa International Police sa pagpatuman sa arrest warrant sa International Criminal Court sulod sa Pilipinas sa miaging semana.
Miingon si De Guzman nga dayag ang maong isyu nga nakapabahin sa pagbati ug pagtoo sa katawhan apan dili angayang magpadala ang kapolisan kay aduna pa kini tahas nga mao ang paghatag proteksyon sa nasud.
Siya miingon nga mas maayoo nga molikay na lang una sa pagkomento pag-abot sa politika aron walay suliran nga masagubang ang mga pulis nga matintal sa paghimo niini.
Hisayrang may usa ka pulis na nga gikasuhan sa PNP didto sa kauluhan kay wala niya kapugngi nga malooy sa gidangatan ni Duterte hinungdang nabatikos niya si Pres Bongbong Marcos sa miaging semana.
