CAGAYAN DE ORO CITY – Walay gimugna nga opisyal nga baruganan o pahayag ang Police Regional Office 10 kabahin sa giingong pagsanong ni PNP chief General Nicolas Torre III nga makig-boksing kang Davao City Vice Mayor Sebastian ‘Baste’ Duterte.
Kini human viral ug trending ang pagdawat ni Torre sa hagit ni Baste nga mas maayo nga iagi na lang nila sa sumbagay ang ilang walay bugto nga panaglantugi sa mga isyu sa katilingban.
Namahayag sa Bombo Radyo si PRO 10 spokesperson Police Major Joann Navarro nga posibleng gihimo kini ni Torre dili isip PNP chief apan sa iyang personal nga kapasidad aron matughan si Baste sa pagpanghagit.
Siya miingon nga maoy importante alang sa PNP nga pabilin sila nga pokus sa ilang trabaho paghatag hugot nga seguridad alang sa katawhan sa nasud.
Pagpasabot ni Navarro nga wala dad-a sa heneral ang pangalan sa pamulis sa nasud kabahin sa iyang pagsanong sa hagit.
Hinoon,dili kalikayan nga adunay gihuptang tagsa-tagsa ka fans ang duha ka government officials rason nga init ang hisgutanan niini sa social media.
