CAGAYAN DE ORO CITY – Dili angayang magkampante ang tropa sa kapolisan bisan nga nakab-ot niini ang sobra ka malinawon ug walay dugu-ong mga hitabo sa pagasaulog sa kapaskuhan sa Northern Mindanao region.
Pagpasidaan kini Police Regional Office 10 Director Brig Gen Jaysen De Guzman sa ilang lower units aron dili malutsan sa bisan unsa nga panghitabo nga makabalda sa pagsaulog sa pagsugat sa bag-ong tuig pipila ka oras gikan karon.
Miingon si De Guzman nga anaa sa taas nga alerto ang kapolisan sa tanang mga lugar diin dagsa ang katawhan.
Sukad petsa 15 sa Disyembre,walay gitugtan sa PNP nga makahimo’g vacation leave sa ilang mga personahe gawas lang kon kinahalanganon ug emerhensiya.
Samtang dili lang kutob sa sulti apan angayang linawas nga susihon sa nagkadaiyang police station commanders ang troop deployment sa ilang mga personahe nunot sa pagsugat sa bag-ong tuig ning syudad.
Kini ang kabahin sa mga estratehiya nga gipatuman ni COCPO City Police Director Col. Salvador Radam sa pagsunod sa PNP order kabahin sa maong kasaulugan.
Miingon si COCPO spokesperson Lt Col. Evan Viñas nga nag-unang tuyo niini nga masaulog sa katawhan ang luwas,alegre apan iwas sa disgrasya nga pagsulod sa tuig 2025.
Hisayrang usa sa mga gitutukan sa mga otoridad ang mga dinagko nga kasong pagpangawat sama sa pagpanglungkab sa dagkong mga patigayon diin sagad mahitabo sa tag-as nga holidays.
