CAGAYAN DE ORO CITY – Walay epekto sa kapolisan ang paglangkat ni Pres Rodrigo Duterte kang Vice Pres Leni Robredo isip co-chairperson sa Inter-Agency Committee on Illegal Drugs o ICAD.
Gibutyag ni PRO-10 spokesperson Lt Col Mardi Hortillosa nga maghulat sila sa kamanduan sa Camp Crame sa mga bag-ong gabayan sa kampaniya batok illegal nga droga.
Gitin-aw ni Hortillosa nga magpadayon ilang trabaho bisan kinsa ang itudlo nga co-chairperson sa ICAD. Kahinumduman nga wala pa miabot sa tulo ka semana si Robredo dihang gidawat niya ang hagit ni Duterte nga magsilbing co-chairperson sa ICAD.
Samtang nagdumili una paghatag sa reaction si PDEA-10 regional Dir Wilkins Villanueva sa pagtangtang ni Duterte kang Robredo.
Si Villanueva miingon nga hulaton una nila ang opisyal nga pahayag ni PDEA Director Gen.Eron Aquino mahitungod sa maong hisgutanan.
Apan giklaro ni Villanueva nga walay nausab sa ilang trabaho dihang paglingkod ni Robredo isip co-chairperson sa ICAD.
Samtang nagtoo si Citizen Watch for Good Governance o CWGG convenor Atty. Antonio Soriano nga makadaut kang Duterte ang pagtangtang niini kang Robredo isip co-chairperson sa ICAD sa nasud.
Sumala ni Soriano nga posibleng nagselos ang presidente sa maayong gihimo ni Robredo sa ICAD busa gipapha kini sa serbisyo.
Gikasubo usab sa abogado ang lakang ni Duterte gumikan kay wala lamang natagaan niini sa igong higayon si Robredo sa pakigbatok sa illegal nga druga sa nasud.
Bisan usab si nagtoo si Archdiocese of Cagayan de Oro consultor Msgr. Rey Monsanto nga wala motabang si Robredo kang Duterte sa kampanya niini batok illegal nga druga sa nasud.
Si Monsanto miingon nga gibutang ni Duterte si Robredo sa pagka co-chairperson ICAD aron unta nga makatabang sa pakigbatok sa problema sa druga sa nasud.
Apan posible nga nakita sa presidente nga wala kini motabang busa gipapha sa serbisyo.
