Nagpasalig ang Police Regional Office‑10 nga wala silay santohon sa gipakusgang kampanya batok sa iligal nga pagmina sa rehiyon.
Matod ni PRO‑10 Spokesperson Police Major Joan Navarro, ubos sa liderato ni Regional Director Brigadier General Christopher Abrahano, dili tugotan sa kapulisan nga mahimong pugad sa iligal nga kalihokan ang Region 10, ilabina sa iligal nga pagmimina.
Giingon ni Navarro nga padayon nilang paigtingon ang operasyon ug walay bisan kinsa nga luwas sa balaod, bisan pa og unipormadong personahe o sakop sa kapulisan.
Dugang pa niya, ang sunod‑sunod nga pagkadakpi sa mga men in uniform nga nalambigit nagpakita nga seryoso ug sinsero ang kampanya sa gobyerno batok sa paglapas sa Republic Act 7942 o Philippine Mining Act of 1995.
Busa, gidasig sa PRO‑10 ang publiko nga mopadayon sa pagreport sa mga kadudahang kalihokan aron mapadali ang pagdakop sa mga responsable.
