CAGAYAN DE ORO CITY – Nag-zero crime related incidents ang Northern Mindanao sa kasaulugan sa ika-123 ka tuig nga Labor Day o adlaw sa mga mamumuo ning tuiga.
Kini subay sa pagpaniid sa 3-mil 400 ka pulis nga mihatag sa seguridad sa ilang tagsa-tagsa ka hurisdiksyon palibot sa rehiyon.
Gibutyag ni Police Major Joann Navarro,tigpamaba sa Police Regional Office 10 nga anaa sa tulo ka kalihukan may kalabutan sa Labor celebration nga natigayon dinhi sa syudad,Bukidnon ug Iligan City diin daghang katawhan ang midagsa ug kini nahatagan sa bastante nga pagbantay.
Kini ang rason nga walay bisan unsa nga panghitabo nga nakatugaw sa pagdumdom sa dakong importansiya sa mga trabahante sa selebrasyon sa Labor Day.
Una niini,gimando ni PRO 10 regional director Brig Gen Jaysen De Guzman ang pagtaas alerto alayon sa kalihukan aron masiguro nga malinawon ug walay matala nga kagubot sa bisan asa sa lima ka probinsya sa rehiyon.
