CAGAYAN DE ORO CITY – Naka-full alert status ang puwersa sa Police Regional Office 10 kuyog ang kasundaluhan alayon sa mga aktibidad ning adlawa hangtod sa sumad sa Domingo sa pagkabanhaw sa Ginoo ning semana santa.
Gibutyag ni Police Regional Office 10 spokesperson Lt Col Michelle Olaivar nga hinoon,walay impormasyon nga nakuha ang intelligence community nunot sa seryosong bahad sa seguridad apan gipaniguro nila ang hugot nga pagtutok sa mga aktibidad sama sa pagdagsa sa mga tawo sa simbahan ug pilgrimage sites.
Miingon ang opisyal nga gawas lamang kon magkasakit ang ilang mga personahe,gimanduan sila nga kanunay’ng andam sa pag-responde sa oras nga may dagkong mga hitabo sa palibot.
Samtang espesyal nga gipatutukan ni Police Regional Office 10 Director Brig Gen Benjamin Acorda Jr sa ilang 679 ka police personnel ang duha ka dagkong aktibidad sa mga deboto sugod ning adlawa.
Si Olaivar miingon nga pokus lamang sa maong tropa nga luwas ang mga kalihukan sa simbahan ingon man ang pagpamalandong sa mga deboto partikular sa bukid sa Malasag sa Brgy Cugman ug Our Lady of Guadalupe Shrine sa Brgy Tablon.
Dugang sa ospiyal,gipahimutang usab ang sobra gatus ka pulis sa mga terminal,airport ug pantalan alang sa maong katuyuan.
Samtang activated na usab ang regional intelligence fusion center sa National Intelligence Coordinating Agency 10 dinhi sa Northern Mindanao.
Tumong niini nga mapakusog ang intelligence gathering sa gobyerno aron masanta ang bisan unsang kolor sa pagpanghasi ug kagubot sa pagbalaan sa mga deboto sugod ning adlawa ug Biyernes Santo.
Namahayag si NICA-10 Director Manny Ordonia nga makasiguro ang katawhan sa lig-on nga koordinasyon sa gobyerno ilabina sa PNP, AFP ug LGUs alang sa “intel-sharing” aron mahimong hapsay ug malinawon ang pagbalaan sa seman santa.
Gikompirmar usab ni Ordonia ang unang pahayag sa PRO 10 nga negatibo pa sa mga impormasyon nga dunay pundok sa dautang mga tawo nga tuyo mohimo’g pagpanghasi sa kahusay’g kalinaw dinhi sa rehiyon.
