CAGAYAN DE ORO CITY – Giawhag ni Police Regional Office -10 regional director Brigadier General Rolando Anduyan ang local govt unit officials nga supak sa travel authority nga magpadala’g sulat sa PNP national headquarters sa Kampo Crame.
Tumong niini nga mahataga’g katumanan ang ilang hangyo nga wad-on na ang travel authority sa mga residente sa syudad ug Misamis Oriental nga naghatag purwesyo sa pagbiyahe sa katawhan.
Si Anduyan miingon nga pabilin nga ilang sundon ang balaod hinungdan nga ilang ipadayon ang pagpangayo sa travel authority sa mga mobiyahe sa syudad ug lalawigan.
Siya miingon nga dako’g ikatabang ang travel authority alang sa contract tracing sa mga mag-positibo sa Covid-19.
Samtang hugot nga gibarugan ni City Mayor Oscar Moreno nga dili na kinahanglanon ang travel authority sa mga mobiyahe sa sa syudad padulong Misamis Oriental ug vice versa.
Si Moreno miingon nga klaro sa direktiba sa Inter-Agency Task Force nga maoy pangayuan sa travel authority kadtong mobyahe padulong sa laing rehiyon.
Dugang ni Moreno nga gahatag lamang sa dugang kahago ang travel authority sa katawhan ilabina nga kinahanglan pa niini nga mokuha sa medical certificate sa city ug municipal health offices.
Una nang gimanduan ni Moreno si City Police Director Colonel Henry Dampal nga hunongon na ang pagpangayo sa travel authority sa mga taga sa syudad.
