CAGAYAN DE ORO CITY – Gisugdan na’g imbestigar sa Police Regional 0ffice-10 ang siyam ka pulis nga kabahin sa kapi’g 300 nga naka-floating status kay nasulod sa illegal drugs watchlist ni Pres Rodrigo Duterte.
Kini human kompirmaha sa Bombo Radyo ni PRO-10 regional director Brig Gen Rolando Anduyan nga dunay dul-ag napulo ka pulis ang anaa sa maong listahan ni Duterte.
Apan giklaro sa heneral nga dili ‘homegrown’ o taga- dinhi sa rehiyon ang maong mga pulis ug hinoon naggikan sila sa Eastern Visayas ug Luzon regions nga nalabay lamang sa Mindanao.
Una niini,mismo si Anduyan ang misulti sa Bombo Radyo nga wala na nila gikakurat nga naapil sa listahan sa suspected drug protectors si Lt Col Jovie Espenido nga kanhi commander sa Ozamiz City Police office.
