CAGAYAN DE ORO CITY – Dili imposible nga mopatuman sa paglahugay sa city ug provincial directors sa duha ka highly urbanized cities ingon man lima ka probinsya nga ubos sa Police Regional Office 10 nga nakabase sa syudad.
Kini sunod-sunod nga mihimo’g command visits si PRO 10 Director Brig Gen Rolindo Suguilon sa mga lower unit aron himamaton ang mga kaubang pulis.
Miingon si PRO 10 spokesperson Major Joann Navarro nga kung unsa man ang makuha nga impormasyon sa ilang heneral sa mga pagbisita ang kabahin sa mga basehan alang sa posibleng pagpatuman sa lahugay.
Kini ilabina kay adunay pipila ka police directors na nga nakaabot na sa duha ka tuig sa pagsilbi nila nga kumander sa tagsa-tagsa ka city ug provincial commands.
Hisayrang tipik sa naduaw na ni Suguilon ang tropa sa Cagayan de Oro City Police Office ingon man sa Misamis Oriental Police Provincial Office ug Bukidnon Police Provincial Office sulod ning semanaha.
