CAGAYAN DE ORO CITY – Giangkon ni Police Regional Office -10 spokesperson Lt Col Mardi Hortillosa nga apektado sila sa isyu sa ninja cops nga giingong protektado ni PNP chief Dir Gen Oscar Albayalde.
Kini human unang gimando nga tangtangon ang 13 ka pulis tungod sa pag-recycle sa shabu sa Pampanga apan gipugngan ni Albayalde kay kanhi niya mga personahe kaniadto.
Miingon si Hortillosa nga dili kalikayan nga apektado ang imahen sa PNP apan magpadayon sila sa ilang trabaho samtang hulaton ang resulta sa imbestigasyon sa senado.
Una nang gipamugos ni Hortillosa nga walay bisan usa ka pulis sa PRO-10 nga nalambigit sa shabu recycling dinhi sa rehiyon.
Samtang lig-on ug pabiling maayo ang relasyon sa PDEA-10 operatives ngadto sa mga personahe sa Police Regional Office-10 sa kampanya kontra ilegal nga droga sa rehiyon.
Pasalig kini ni PDEA regional director Willkins Villanueva tungod sa daw pagbikili sa ilang kadagkuan ug sa PNP gumikan sa shabu recycling issue nga hinimuan sa ninja cops sa kauluhan.
Namahayag si Villanueva nga naka-pokus sila sa ilang sunod nga drug personality targets subay sa mando ni PDEA Dir Gen Eron Aquino ngadto kanila.
Una niini,dungan nga gitumbok ni Aquino ug Magalong si Albayalde nga midupa sa iyang 13 ka pulis nga nasapon pag-recycle sa 200-kilos nga shabu sa Pampanga sa tuig 2013.
