CAGAYAN DE ORO CITY – Sugdan na sa Police Regional Office o PRO-10 ang pagpatuman sa balaod diin magdili sa publiko nga mamaligya’g dagko ug peligro nga klase sa mga pabuto alayon sa pagsaulog sa kapaskuhan ug pagsugat sa bag-ong tuig sa rehiyon.
Miingon si PRO-10 spokesperson Lt Col Mardi Hortillosa nga partikular nga patutukan nila ang mga dagkong syudad sama sa Cagayan de Oro diin mosugod na sa pagpamaligya sa firecrackers ug pyrotechnics sa Disyembre 22 ning tuiga.
Dugang ni Hortillosa nga mando kini gikan ni PNP officer-in-charge Lt Gen Archie Gamboa sa tuyo nga masuportahan ang Oplan Iwas Paputok campaign sa Dept of Health o DoH nga kanunay mi-diskorahe sa publiko paggamit sa mga pabuto.
Samtang mohimo’g mga sorpresa nga pagsusi sa mga establisimiento ang maglangkob sa Task Force Firecrackers ning syudad.
Miingon si DILG City Director Engr Jean Docallos nga gamiton nila ang serbisyo sa oro brgy tanods ilabina nga sila ang mas nasayod sa mga lugar diin adunay mga tawo o tindahan nga namaligya’g mga pabuto.
Dugang ni Docallos nga gusto lamang ipasiguro ni City Mayor Oscar Moreno nga dili mabutang sa peligro ang publiko pag-abot sa kasaulugan sa kapaskuhan ug pagsugat bag-ong tuig.
Sa miaging tuig 2018,nagbaton pa gihapon sa 12 ka tawo ang nabuthan sa klase-klaseng pabuto ug may laing usa nga naigo sa saag nga bala gumikan sa maong mga kasaulugan sa Northern Mindanao.
