CAGAYAN DE ORO CITY – Dili uyon si Police Regional Office -10 Director Brig Gen Rolando Anduyan nga magbaton sa armas ang mga miembro sa Road and Traffic Administration o RTA nga gitahasan pagdumala sa trapiko sa syudad.
Kini human unang gisugyot sa pipila ka city councilors nga angay ipa-armas ang RTA enforcers aron may proteksyon batok sa mga tawo nga dunay kasuko kanila.
Miingon si Anduyan nga imposible kini nga mahatag ilabina nga taas ang proseso ug walay garantiya nga dili mangabuso ang pipila unya sa RTA.
Gani,gihimong pananglitan sa general ang pipila sa iyang mga pulis nga nangabuso bisan kon ensakto pa kini’g disiplina ug training sulod sa ilang ahensiya.
Sa miaging semana,gipusil-patay si RTA member Mark Langam IV samtang kabahin sa mihimo’g clearing operations batok mga tricab ug pendicab sa Brgy Puerto sa syudad.
Samtang gi-depensa ni administration City Councilor Roger Abaday ang iyang sugyot kon nganong angay tugtan maghupot sa armas ang RTA enforcers ning syudad.
Kini human miani’g negatibo nga reaksyon gikan sa PNP ang maong suhestiyon nga giyagyag sa konsehal sa miagi nila nga regular session sa konseho sa syudad.
Miingon si Abaday nga maoy gipasabot niini nga dili tanang RTA members ang ipa-armas apan kadto lamang ang nadestino sa enforcement unit nga mopatuman sa road clearing operations.
