Mas gipahugot pa sa Police Regional Office Bangsamoro Autonomous Region ang ilang pagpangandam alang sa gikatakdang unang Bangsamoro Parliamentary Elections karong Septiyembre 14.
Kini subay sa gipadayag ni PCAPT. Steffi Salanguit, ang tigpamaba sa PRO-BAR, kinsa nagkanayon nga hugot na ang ilang koordinasyon sa Commission on Elections ug Armed Forces of the Philippines alang sa seguridad.
Gi-detalye ni PCAPT. Steffi Salanguit nga mokabat sa 7,500 ka mga organic personnel ang ilang ipakatap sa tibuok rehiyon.
Gawas niini, mangayo usab sila og dugang 2,000 ka mga pulis gikan sa mga silingang rehiyon sa 9, 10, 11, 12, ug 13 aron masiguro ang kalinaw sa tibuok election period.
Sa paghiusa niini, gipaabot nga moabot sa 9,000 ka mga sakop sa kapulisan ang magbantay aron magpabiling hapsay ug malinawon ang maong piniliay.
