Galaum ang kampo sa prosekusyon nga wala na’y mga isyu o mosyon nga mahimong hinungdan sa laing pagkalangan sa pagpadayon sa impeachment trial batok kang Vice President Sara Duterte karong Lunes, Nobyembre 9.
Gitinguha sa prosekusyon nga modiretso na ang trial sa nahibiling Article II o ang alegasyon sa unexplained wealth, inay nga hisgutan na usab ang mga artikulo sa impeachment nga wala na gipadayon.
Matud ni House Prosecutor Atty. Jay Tolosa Jr., naglaom sila nga wala na’y ipasaka nga mga pre-referral matters o mga hisgutanan nga kinahanglang sulbaron una sa dili pa magpadayon ang mismong pagdungog.
Partikular nga gitumbok ni Tolosa ang unang gipamugos sa kampo sa depensa nga kinahanglan gihapon silang tugotan nga magpresentar og ebidensya nga dunay kalabotan sa mga artikulo sa impeachment nga gitangtang na sa prosekusyon.
Gioamugos ni Tolosa nga klaro na ang nahimong desisyon sa Senate Impeachment Court nga dili na kinahanglang tugotan ang maong lakang tungod kay wala na kini kapuslanan sa trial ug mahimo lamang kining makapalangan.
Naglaom usab ang prosekusyon nga mahuman ang pagtuki sa nahabiling artikulo sa dili pa matapos ang tuig. (raniel mahunyag)
