Wala na nakita sa House prosecution panel ang panginahanglan sa pagpresenta og dugang nga mga ebidensya kalabot sa alegasyon sa unexplained wealth batok kang Vice President Sara Duterte sa nagpadayong impeachment trial.
Gipadayag ni House prosecution panel private prosecutor ug legal spokesperson Atty. Benjamin “Jay” Tolosa Jr. nga kumpiyansa ang ilang kampo sa mga dokumento ug ebidensyang napresenta na nila sa impeachment court aron mapamatud-an ang matud pa wala madeklarang bahandi ug kabtangan nga giingong nagkantidad og kapin sa 800 milyon pesos nga gilambigit sa Bise Presidente ug sa iyang bana nga si Atty. Manases “Mans” Carpio.
Matud ni Tolosa, igo na alang sa ilang panig ang mga ebidensya nga ilang napresenta ug sa kasamtangan kay dunay higayon ang depensa nga tubagon ug supakon ang maong mga alegasyon.
Mahinumdoman nga naggikan ang maong kantidad sa pagusi ni prosecution witness ug forensic accounting expert Alexander Cabrera sa mga bank records, tax documents, corporate records ug Statements of Assets, Liabilities and Net Worth (SALN) sa magtiayong Duterte-Carpio gikan sa tuig sa 2022 hangtud sa 2025. (raniel mahunyag)
.jpg "Palasyo, gipatin-aw ang rason sa pagbalhin sa mga opisyal sa gabinete sa administrasyong Marcos")
