Gipasabot ni kanhi Cagayan de Oro City Councilor Atty. James Judith nga padayon pang nagpahimutang ug pundasyon ang panig sa prosekusyon sa impeachment trial ni Vice President Sara Duterte ilabi na sa pagtuki sa Article 1.
Bisan pa nga naestablisar ang paggawas sa minilyon ka pesos gikan sa Landbank, gipunting niya nga kinahanglan pa gihapon og mga saksi nga makatubag sa mekanismo sa confidential fund aron mapamatud-an ang maong kalapasan ug ang kontrobersyal nga pangalang Mary Grace Piattos.
Gidugang usab niya nga husto ang obserbasyon ni Senator Ping Lacson tungod kay wala pa matumbok sa pasiunang testimonya nina Violeta Constantino ug Nenita Camposano kon aduna ba gyoy iregularidad sa OVP.
Busa nag-atubang pa og dakong hagit ang prosekusyon sa mga mosunod nga adlaw aron makonektar ang maong mga transaksyon sa pasangil nga wala gigamit sa hustong katuyoan ang maong pondo.
