Misamot ang kagubot sa mga protesta batok sa gobyerno sa Albania, diin nagpadayon ang mga demonstrasyon sa kaulohang dakbayan sa Tirana niadtong Oktubre 14 ning tuiga.
Gipangayo sa mga estudyante ang pagpaubos sa gasto sa edukasyon, mas maayong kahimtang sa mga unibersidad ug dugang nga suporta alang sa mga nag-eskwela.
Nanawagan usab ang mga demonstrador sa pag-resign ni Prime Minister Edi Rama tungod sa mga alegasyon sa korapsyon sa iyang administrasyon.
Misangpot sa panag-atbang sa pipila ka demonstrador ug kapulisan ang maong protesta, diin gigamit sa mga pulis ang tear gas ug water cannon aron pakalmahon ang sitwasyon.
Sumala sa mga awtoridad, 23 ka pulis ug 6 ka sibilyan ang naangol, samtang 35 ka tawo ang gidakop may kalabotan sa kagubot. (jane abulag)
