CAGAYAN DE ORO CITY – Nalinggawas sa kasong kriminal kay nahusay sa provincial capitol employee ang pagkaligsi-patay sa 60 anyos nga lalaki apan sa obligasyong administratibo hayan magbutang kaniya sa alanganin.
Kini human isulti ni Tagoloan Municipal Police Station commander Captain Ralph Rexson Layug nga personal ang lakaw sa driver nga si Cesar de la Cerna Bacan nga taga-Brgy Bugo gamit ang government vehicle nga wala damha nakaligis-patay sa residente samtang patabok sa highway sa Tagoloan sa miaging Hunyo 17 sa gabii.
Miingon si Layug nga nahusay na ang panig sa duha ka kampo hinungdan wala na’y kasong gipasaka sa pamilyas sa biktima nga si Simeon Galinatao nga taga-Brgy Casinglot sa piskalya kontra Bacan.
Apan subay sa imbestigasyon,gigamit nga personal sa suspek ang sakyanan sa gobierno sa maong higayon nga dili sugo sa kapitolyo-probinsyal kay gitamod ang holiday nunot sa Feast of Sacrifice sa mga igsoong Muslim sa nasud.
Una nang namahayag usab ang suspek nga wala niya mabantayi pagtabok sa biktima kay naka-go signal ang traffic light ug kusog ang pagbundak sa ulan dihang natigayon ang aksidente.
