Gipasig-uli sa Philippine Statistics Authority (PSA) Region 10 ang paningkamot sa paghatag sa physical nga PhilSys National ID sa mga katawhan nga hangtod karon wala pa makadawat sa ilang card. Sumala ni PSA–Regional Statistical Services Office X Chief Administrative Officer Jose Tuason, padayon ang ilang lakang aron mapaspasan ang pag-release sa mga National ID cards nga pila na ka tuig nang gihulatan sa katawhan. Butyag ni Tuason, nagsugod na ang PSA sa pilot printing isip kabahin sa plano nga i-decentralize ang pag-imprinta sa mga National ID aron mas dali kining mahatag sa mga tag-iya niini.Gimando na usab sa PSA Central Office nga ang pag-imprinta sa mga National ID buhaton na sa matag rehiyon o probinsya pinaagi sa lokal nga buhatan sa PSA aron malikayan ang dugay nga paghulat. Sa pagkakaron, anaa pa sa procurement stage ang mga ekipo nga gamiton sa pilot printing.Pasalig ni Tuason, sa higayon nga ma-finalize ang proseso, ipaubos dayon kini sa provincial level aron mas paspasan ang pag-imprinta ug paghatag sa National ID cards ngadto sa katawhan. (James Oliver)
