CAGAYAN DE ORO CITY –Naglaum si Gov. Bambi Emano nga makab-ot na sa probinsya ang tinud-anay nga kalinaw sa Misamis Oriental.
Kini human pormal nga gitukod ang Misamis Oriental Provincial Task Force-End Local Communist Armed Conflict o PTF – ELCAC sa Brgy Eureka,Gingoog City kagahapon sa buntag.
Namahayag si Emano nga pinaagi sa maong task force,mapadali ang pagpaabot sa batakang serbisyo nga nahikaw madawat sa katawhan sa mga baryo nga gisakyan usab sa CPP-NPA.
Gitumbok sa militar ug kapolisan nga pabiling bahad sa seguridad sa kalambutan sa katawhan ang presensya sa CPP-NPA sa pipila ka lungsod sa probinsya.
Samtang giangkon ni 4th Infantry Division commander Major Gen. Franco Nemecio Gacal nga dili kaya kon PNP ug AFP lamang ang mosulbad sa insurhensiya sa matag-lugar sa nasud.
Kini ang hinungdan nga giporma ni Pres Rodrigo Duterte ang executive order no. 70 aron obligahon ang matag-gobiernong lokal nga abagan ang mga programa sa national offices pagtubag sa kakulangon sa katawhan.
Gihimo ni Gacal ang pahayag dungan sa pormal nga pagporma sa Misamis Oriental Provincial Task Force-End Local Communist Armed Conflict sa Gingoog City kagahapong adlawa.
