Gipasalig ni Committee on Public Safety Chair Konsehal Roger Abaday nga naka-in place na ang tanang security plans alang sa hapsay ug malinawong selebrasyon sa Higalaay Festival sa dakbayan sa Cagayan de Oro.
Bisan pa man sa ilang hugot nga pagpangandam, gipahinumdoman gihapon niya ang katawhan nga dili magkumpiyansa ug padayong magpabiling alerto sa tanang ipahigayon nga kalihokan.
Aron masiguro ang hiniusang pagbantay sa kahusay ug kalinaw, hugot usab nga gi-engganyo sa opisyal ang pakig-alayon sa mga barangay personnel ug tanod aron motabang sa pagmonitor ug pagreport sa mga mosupak sa balaod karong panahona sa pista.
Sa katapusan, gibutyag ni Abaday nga well-prepared ug pormal na nga naka-deploy ang mga personnel gikan sa lokal ug nasyonal nga kapulisan, RTA, NTC, ug uban pang ahensya sa matag dapit nga dunay kalingawan.
