Giawhag sa grupong No to Oil Price Hike Coalition ang mga commuters ug transport sector sa Cagayan de Oro nga makigduyog sa nationwide nga welga karong Marso 26 hangtod 27 aron ipakita ang ilang protesta batok sa padayon nga pagsaka sa presyo sa lana sa nasud.
Gibutyag ni Bong Lazaro, tigpamaba sa grupo, ang ilang unom ka urgent demands naglakip sa pag-repeal sa Oil Deregulation Law, pagkunhod sa excise tax, pagbalik sa presyo sa gasolina ug diesel ngadto sa ₱55 kada litro, ug pagtaas sa minimum wage ngadto sa ₱1,200.
Sa iyang pakighinabi sa Bombo Radyo, gisulti ni Lazaro nga bisan pa sa posibilidad sa ayuda gikan sa gobyerno, dili gihapon kini epektibo aron masulbad ang krisis nga dala sa taas nga presyo sa lana.
Mas gikinahanglan ang lig-on nga mga polisiya gikan sa gobyerno.
Sa ilang panan-aw, kinahanglan ang koordinado ug direkta nga aksyon nga buhaton karon sa gobyerno aron mahatagan og hustisya ang katawhan ug mapagaan ang epekto sa krisis sa transportasyon.
