CAGAYAN DE ORO CITY – Mismo na si City Mayor Klarex Uy ang miapelar sa katawhan nga sundon ang giyagyag nga gabayan sa City Health Office kabahin sa pakigbatok sa bahad sa monkey pox o MPOX.
Kini bisan nga nagdumili ang mayor pag-obligar sa katawhan nga subli mosul-ob sa facemask aron kapugngan nga pagkaylap sa Mpox sa higayon nga makalusot ang transmisyon niini gikan sa ubang rehiyon.
Miingon si Uy nga dili niya gusto nga lisud-lisuron ang katawhan apan angayang buhaton usab nila ang obligasyon nga proteksyonan ang ilang kaugalingon alang niini.
Siya miingon nga igo na nga ma-obserbar sa publiko ang minimum health standard aron dili basta-basta malutsan ang syudad.
Dumduman nga mismo si CHO head Dra Rachel Dillia ang naglugwa’g mando nga obligado ang mga ilang mga empleyado ug brgy health center workers nga magsul-ob sa facemask aron proteksyon ang ilang mga kaugalingon.
Hisayrang nagkaduol ang presensiya sa MPOX kay ulahi kining nakaigo sa pasyente gikan sa Zamboanga Peninsula sa miaging bulan.
