Gihangyo ni kanhi Cagayan de Oro City Mayor Atty. Constantino Tinnex Jaraula ang tanang mga katawhan ug mga opisyal sa gobyerno nga dili maghilom ug mopadayag sa ilang baruganan kabahin sa kasamtangang kahimtang sa Senado.
Subay sa iyang pamahayag, responsibilidad sa katawhan ang pagsaway kung ang mga napili nga lider dili mosubay sa insakto nga balaod ug maayo nga pagpadagan sa nasod.
Tungod niini, nanawagan siya sa mga kongresista nga mohimo og lakang ug mogahin bisan singko minutos lang aron manawagan sa mga senador nga biyaan na ang away-away ug unahon ang kaayuhan sa nasod imbis nga ang personal nga politika.
Gipasabot usab sa kanhi mayor nga importante kining mga aksyon tungod kay ang panag-away sa Senado maoy hinungdan nga malangan ang pag-apruba sa mga importanteng balaodnon nga gikan sa Kamara.
Sa ulahi, gipahinumdoman ni Atty. Jaraula ang publiko ug ang media nga sila ang adunay dakong papel sa pagpadayag sa tingog sa katawhan aron mahatagan og pagtagad sa mga opisyal ang maong isyu.
