CAGAYAN DE ORO CITY – Walay nakit-ang foul play ang mga otoridad sa kamatayon sa usa ka aktibong pulis nga unang na-report nga na self-accident samtang sakay sa iyang motorsiklo sa dalang JR Borja Extension, Brgy Gusa ning syudad.
Giila ni COCPO traffic investigator Police Staff Sgt Maximo Judaya ang biktima nga si Police Patrolman Larry Bugasao Jr,25 anyos,ulitawo ug taga-Bukidnon ug nadestino sa Regional Mobile Force Batallion 10 nga nahimutang sa Upper Gusa sa dakbayan.
Miingon si Judaya nga posibleng nawad-an sa kontrol ang biktima sa pagpadagan sa motorsiklo rason nga nabangga kini sa center island sa maong lugar kaganihang kadlawon.
Dead on arrival usab kining nakaabot sa ospital gikan sa accident area.
Samtang motunol sa tabang-pinansyal ang Police Regional Office 10 ngadto sa pamilya sa ilang kauban nga nadisgrasya-patay.
Miingon si PRO 10 spokesperson Police Maj. Joann Navarro nga wala sa ilang palisaya sa PNP ang paghimo niini apan may inisyatiba gihapon sila aron makatabang ngadto sa ilang mga kauban nga nalambigit sa disgrasya.
Siya miingon nga aktibo ang ilang programa nga ‘pagduyog sa kasakit’ alang sa pipila ka pulis nga anaa sa aksidente.
Una nang gitoohan nga padulong sa trabaho si Bugasao apan na-self accident hinungdan sa kamatayon niini kaganihang kadlawon.
