CAGAYAN DE ORO CITY – Dili makalusot apan atubangon gihapon sa aktibong pulis ang kasong pagsupak sa Comprehensive Dangerous Drugs Act of 2002 bisan wala kini aktong nadakpan sa mga operatiba sa Philippine Drug Enforcement Agency 10 sa mismong gisak-ang balay niini sa Barangay Sihayon,Tagoloan,Misamis Oriental.
Kini human isulti ni PDEA 10 regional director Atty Benjamin Gaspi nga nag-unang target nila sa court’s search warrant ang balay ni Police Staff Sargeant Armand Tagolimot alyas ArTags kay dunay mga impormasyon nga may ilegal nga droga sa sulod niini.
Namahayhag si Gaspi nga iagi na lang sa regular proceedings ang pagduso’g kaso batok sa maong pulis aron makatubag kini sa gipakang nga pasangil kontra kaniya.
Sa paglusob sa gisak-ang balay sa maong pulis, nadakpan ang kauban niini nga si Janice Lacar ug dunay nakuha usab ang PDEA operaratives nga 20 gramos nga gitoohang shabu.
Gilayong gisunod nila pagronda ang laing tulo ka mga balay nga gipanag-iya ni Jun Maagad Factura;Maristela Romuga ingon man Orland Maagad Factura Jr.
Apil usab sila gipangdakop kuyog ang tulo ka anak ni Orlando Sr nga sila Kenneth;Orland Jr ug Angelica Factura nga anaa usab sulod sa balay.
Nabawi gikan sa maong mga balay ang dili moubos 100 gramos nga gitoohang shabu nga dunay sobra tunga-milyones pesos nga kantidad,mismong gitoohang mga halin nga salapi sa pagbaligya’g droga; armas ingon man uniporme sa pulis ug ubang drug paraphernalia.
Nasayran nga si Artags ang aktibong sakop sa Provincial Drug Enforcement Group o PDEG nga ubos sa Misamis Oriental Police Provincial Office.
