CAGAYAN DE ORO CITY-Gihataga’g hugot nga seguridad si PO3 Alejandro Ubanan samtang nagpaalim human dunggaba sa duha ka kauban piniriso sulod sa Misamis Oriental Provincial Jail diha sa Corrales-Luna Streets ning syudad kagahapon sa hapon.
Kini human nakaangkon sa dinunggaban sa icepick ang dughan ug binunalan sa bato ang ulo ni Ubanan sa wala pa mabutyag nga rason.
Gibutyag ni Provincial Jail Warden Dominador ‘Boy’ Tagarda nga gipaubos ang mga piniriso sa head counting dihang
natigayon ang pagdunggab kang Ubanan hinungdan nadala sa Northern Mindanao Medical Center.
Si Ubanan kauban nila ni Sr/Insp. Ereneo Ramirez,SPO2 Jojo Lim, SPO1 Alaindelon Tacubao ug PO2 Sangkula Hussein ang akusado pagdagit sa negosyante nga si Enrique Fernandez III ning syudad niadtong Oktubre 2013.
Si Ubanan ang gimando sa korte nga ibalhin sa provincial jail gikan sa city jail tungod sa pag-away na nila sa grupo ni Ramirez.
