CAGAYAN DE ORO CITY – Nakasuhan na’g kriminal sa piskalya ang bagitong pulis nga giakusahan sa mga sibilyan nga nanion kanila’g armas ug nanumbag samtang kini hubog diha sa Adela Subd. ,Brgy Camaman-an ning syudad.
Gibutyag ni Cogon Police Station deputy commander Police Lt Lowell Amor Estampa nga kasong grave threats ug multiple physical injuries ang ilang gipasaka batok kang Patrolman Jomarie Venemerito, 25 anyos, ulitawo nga taga-Valencia City, Bukidnon ug ubos sa City Mobile Force Company dinhi sa syudad.
Gawas niini,naka-floating status na ang suspek pending sa iyang atubangon nga administrative charges sa PNP.Samtang nangayo usab pasaylo si Venemerito sa iyang mga kauban sa PNP apan kusganong gihimakak nga nani-on siya’g armas ug nangulata sa mga sibilyan.
Samtang gigarantiya sa liderato sa Police Regional Office 10 nga dili palabyon apan mag-atubang sa silot-administratibo ang ilang kaubang pulis nga nagpakaulaw ug nagbuling-buling sa reputasyon sa PNP.
Panganti kini ni PRO 10 spokesperson Police Lt Col Michelle Olaivar kabahin sa iskandalo nga gihimo ni Venemerito nga midagmal sa halos napulo ka sibilyan ning syudad.
Gibutyag ni Olaivar nga mismo pa unta sila ang gapaduol ug mangayo’g tabang sa katawhan apan dunay pipila sa ilang mga kauban nga miguba sa integridad sa PNP.
