Nakabsan sa kinabuhi ang 34 anyos nga si Police Patrolman Peter Jhon Edio human kini naaksidente samtang nagmaneho sa iyang motorsiklo sulod sa Gran Europa Subdivision sa Barangay Lumbia ning siyudad niadtong Dominggo sa hapon, Hunyo 14, 2026.
Subay sa inisyal nga impormasyon gikan sa kapulisan, naigo ang ligid sa motorsiklo sa biktima ngadto sa semento nga bahin sa center island hinungdan nga nawad-an siya og kontrol ug mibangga sa usa ka kahoy.
Bisan pa sa daling pagresponde sa mga rescue team ug pagdala kaniya sa St. Francis Hospital, gideklarar kini nga wala na kiniy kinabuhi sa mga doktor tungod sa grabeng samad sa iyang ulo ug lawas.
Sa pagkakaron, gipahibalo ni PMAJ Joann Navarro spokesperson sa Police Regional Office 10 nga padayon ang ilang pagsubay sa nahitabo nga insidente sa maong dapit.
Hinuon, nagpaabot pa ang buhatan sa dugang detalyado nga report gikan sa ilang traffic investigators kalabot sa maong makalilisang nga aksidente.
