(Update) CAGAYAN DE ORO CITY – Patay na ang police patrolman nga lakip sa sakay sa patrol car nga gibanggaan sa forward truck kay nawad-an sa preno sa Sitio Mirasol Dos, Brgy Cabatian, Magsaysay,Misamis Oriental.
Giila ang biktima nga si Patrolman Clyde Retiquez kinsa ubos sa superbisyon sa Misamis Oriental Provincial Police Office.
Gibutyag ni Capt. Stephene Latar, hepe sa Magsaysay Police Station nga padulong mohimo’g inspeksyon ang sakop sa 1st Provincial Mobile Force Company dihang kasugat ang forward truck nga gimaneho ni Christian Rey Duranggo nga taga-Butuan City nga nagresulta sa aksidente.
Kabahin sa anaa sa kritikal nga kondisyon sila si Police Maj Joel Salo,Staff Sgt Manny Jefferson Valmoria samtang nakaangkon usab sa mga bun-og ug samad sila si Sr Master Sgt Saburnido,Cpl Gonzales ug Cpl Nar Ghester Geroy.
Samtang mag-atubang sa tulo ka kasong kriminal ang forward truck driver nga si Christian Rey Duranggo.
Kini tungod sa pagkabangga-i sa police patrol nga gikamatay sa usa ka pulis ug pagkaangol sa lima sa lungsod sa Magsaysay,Misamis Oriental.
Miingon si Latar nga kabahin sa mga kaso nga atubangaon ni Durango ang reckless imprudence resulting to homicide sa piskalya.
Kasuhan usab kini sa reckless imprudence resulting to multiple physical injuries ug reckless imprudence resulting to damage to property sa piskalya ning syudad.
Gitin-aw usab ni Latar nga luwas na ang kahimtang sa lima pa ka kaubang pulis.
