CAGAYAN DE ORO CITY-Patay ang pulis samtang pipila ka sakop sa rebeldeng New People’s Army o NPA Guerilla Front 68 sa North Central Mindanao Regional Command ang giingong samaron sa engkuwentro sa Brgy Concepcion,Pangantucan, Bukidnon.
Giila ni Pangantucan Police Station commander Sr/Insp Dominador Orate Jr ang namatay’ng biktima nga si PO1 John Herbert Pingol nga taga-Wao,Lanao del Sur.
Gisulod sa hiniusang tropa sa 1st Special Forces Batallion sa Philippine Army ug Bukidnon Provincial Public Safety Company ang kampo sa mga rebelde dihang naigo sa likod si Pingol.
Wala na’y naabtan nga mga rebelde ang tropa sa gobierno apan sa unahang bahin sa kampo,kalit sila gipaulanan sa mga bala hinungdan sa pipila ka minutos nga engkuwentro.
Nakabalik pa sa headquarters si Pingol apan nakabsan gihapon kini sa kinabuhi tungod sa daghang dugo nga nawala sa lawas niini.
Dugtong usab niini,subli nagpahimangno ang kapolisan nga dili mohatag kumpiyansa batok sa mga himoon pag-atake sa mga rebeldeng New People’s Army o NPA sa nagkadaiyang bahin sa Northern Mindanao.
Gihimo ni PNP regional spokesperson Supt Lemuel Gonda ang pahimangno tungod sa mando sa CPP-NPA-NDF nga molusad sa nationwide attack batok sa gobierno sa nasud.
Miingon si Gonda nga nasayod na ang tanang kapolisan sa angay buhaton hinungdan nga dili sila gusto makadungog nga may police station nga mailog sa mga rebelde.
