CAGAYAN DE ORO CITY – Samaron ang usa ka pulis sa pag-engkuwentro sa tropa sa 2nd Provincial Mobile Force Company ug Gitagum Police Station batok sa pipila ka sakop sa rebeldeng New People’s Army o NPA sa Purok 6, Brgy Gregorio Pelaez,Gitagum,Misamis Oriental.
Kini human natigayon ang duha ka hugna nga engkuwentro dihang nasugaw sa PNP ang ‘on going recruitment’ sa mga rebelde sa mga sibilyan hinungdan natigayon ang halos 20 minutos nga sinukliay sa mga bala.
Gibutyag ni Misamis Oriental Provincial Police Office spokesperson Lt Thefratus Pia nga hinoon luwas ra ang maong pulis gikan sa 2nd PMFC kay dili intimano ang igo niini gikan sa mga rebelde.
Dili makompirmar sa PNP kon may samaron o namatay sa panig sa mga kaaway kagahapong adlawa.
Samtang gihimakak ni Misamis Oriental Provincial Police Office Director Col. Raniel Valones nga may pulis nga naigo sa engkuwentro batok sa pundok sa NPA sa lungsod Gitagum,Misamis Oriental.
Giangkon ni Valones nga nagkasinukliay sa mga bala ang iyang tropa batok sa mga rebelde apan walay samaron sukwahi sa unang mikatag nga report.
Sa pagkakaron,padayon ang ilang hot pursuit operation batok sa mga rebelde aron maabog sa maong lugar.
