CAGAYAN DE ORO CITY – Dakpan ang aktibong pulis kuyog ang iyang sibilyan nga kaabag sa giingong pagpalusot sa inismagol nga mga sigarilyo sa pag-agi sa random checkpoint sa Purok 1,Brgy Butadon,Kapatagan,Lanao del Norte.
Giila ni 2nd Provincial Mobile Force Company commander Lt Col Shirwen Lapiz ang dinakpan nga si Patrolman Johaiber Mamiscal Tawakal,35 anyos nga taga-Brgy Payong ug kasamtangang nadestino sa Sultan Naga Dimaporo Police Station sa Lanao del Norte.
Gibutyag ni Lapiz nga unang gisita sa grupo ni Police Lt Winston Daroy Jr nga natahasan sa checkpoint ang gisakyan ni Tawakal nga kolor metallic silver nga Toyota Innova aron susihon kon unsay karga niini.
Nadiskobre nga nagkarga kini sa smugggled cigarettes nga gitabunan sa raincoat nga gibutang sa backseat rason nga giharang.
Nadakpan pag-apil sa operasyon kauban ni Tawakal nga si Junior Hadji Usman diin sila padulong unta sa lungsod sa Kapatagan aron ipalusot ang maong kontrabando.
Kini ang pinakaunang higayon nga nakasapo’g pulis ang mga otoridad nga nagpalusot sa smuggled cigarettes.
Subay sa imbentaryo, anaa sa 480-mil pesos ang kantidad sa maong kontrabando nga gitugyan na sa Bureau of Customs Iligan City.
