CAGAYAN DE ORO CITY-Tangtangon sa serbisyo ang pulis nga nasapon ug nadakpan nga nanugal sulod sa bulangan sa Brgy. Lam-an, Ozamiz City.
Miingon si PRO-10 spokesperson Police Supt. Surki Serenias nunot na sa accomplishment sa Ozamiz City Police Office nga anaa sa 430 ka sabungero ang ilang nadakpan sulod sa bulangan nga gilakipan sa usa ka pulis ug upat ka kawani sa gobyerno.
Si Serenias miingon nga mag-atubang sa kasong “grave misconduct” ang maong pulis diin usa kini sa mga grounds alang sa iyang “dismissal from the service”.
Dugtong niini, nagpahimangno si Serenias sa kapulisan nga likayan ang pagpanugal ug pag-inom sa pampublikong lugar ilabina nga hugot kini nga gidili ni Presidente Rodrigo Duterte.
