CAGAYAN DE ORO CITY – Mag-atubang sa kasong pagsupak sa Republic Act 9165 (Dangerous Drugs Act of 2002) ang aktibong pulis ug laing upat ka sibilyan sa provincial prosecutor’s office sa syudad sulod ning semanaha.
Kini human nadakpan sa grupo ni Tagoloan Police Station commander Capt Ralph Rexson Layug ang mga suspek sa gilusad nga anti-illegal drug buy bust operation sa Sitio Sto. Niño,Barangay Baluarte,Tagoloan, Misamis Oriental kagabii.
Giila ni Layug ang aktibong pulis nga si Patrolman Raymart Asaytona nga kasamtangang nadestino sa Regional Mobile Force Batallion -13 sa Caraga Region diin nabawi ang iyang 9mm pistol kuyog ang mga bala ug PNP IDs.
Gawas sa maong pulis,nadakpan usab ang mga sibilyan nga pulos hingkod ang edad ingon man nagsilbing laborers nga nagpuyo sa Misamis Oriental ug Bukidnon.
Nakompiskar gikan sa mga dinakpan ang P500 buy bust money;pito ka sachets sa gitoohang shabu;foil ug lighters.
Dumduman nga unang gimando ni Police Regional Office 10 Director Brigadier General Ricardo Layug Jr nga ipalig-on ang kampanya kontra ilegal nga droga ug walay palabyon sa operasyon makauban sa trabaho o gikan sa ubang sektor sa katilingban (Pictures by Cyril Cambolan Jr).
