CAGAYAN DE ORO CITY – Nag-atubang na sa kasong pagsupak sa Republic Act 9165 ang aktibong pulis nga kabahin sa nadakpan sa mga otoridad sa Sitio Sto. Niño,Brgy Baluarte,Tagoloan, Misamis Oriental.
Kini ang gikompirmar ni Police Regional Office 10 spokesperson Police Major Joann Navarro diin may gikasuhan si Patrolman Raymart Asaytona,legal ang edad,nagpuyo sa Manolo Fortich,Bukidnon ug aktibong sakop sa Regional Mobile Force Batallion 13 nga nakabase sa Caraga region.
Namahayag si Navarro nga gipahibalo na nila ang Police Regional Office 13 kabahin sa gidangatan sa kaubang pulis nga nadakpan sa atol sa anti-illegal drug buy bust operation dinhi sa lalawigan sa miaging gabii.
Una nang nabawian sa tropa ni Tagoloan Police Station commander Police Capt.Ralph Rexson Layug ang dinakpan sa iyang kalibre 9mm pistol nga dunay mga bala,PNP IDs atol sa operasyon.
Giklaro ni Navarro nga dili main target sa operasyon si Asaytona apan ang kaubang sibilyan niini nga nabaniug sa pagsilbing suplayer sa ilegal nga droga sa maong lugar.
Kabahin sa nabawi nga mga ebedensiya ang 2 gramos nga shabu nga gisulod sa nagkadaiyang gindak-on nga sudlanan,foil,lighters ug buy-bust money atol sa operasyon.
Mitapos si Navarro sa pag-ingon nga gawas sa kasong kriminal,mag-atubang usab sa obligasyong administratibo ang kauban nila nga pulis tungod sa kalapasan niini sa PNP guidelines.
