(Update) CAGAYAN DE ORO CITY-Gikompirmar sa kapolisan nga dugay nang nalambigit sa pagbaligya’g gidiling droga ang pulis nga nasikop sa buy bust operation sa boarding house niini sa San Vicente,Brgy Casinglot,Tagoloan,Misamis Oriental.
Kini human mismo si Cugman Police Station commander C/Insp Evan Vinas ang nagkompirmar nga dugay na nga nila gi-monitor si PO2 Arnold Almasor nga taga- Brgy Bugo ning syudad tungod sa pagbaligya’g shabu.
Nasikop usab sa joint operation sa PNP ang kaipon ni Almosar nga si Grace Calainan diin sila nakuhaa’g 12 gramos nga shabu ug armas.
Samtang gilayong sugdan sa Cagayan de Oro City Police Office o COCPO ang pag-imbestigar batok kang Almasor nga nasikop sa pagbaligya’g droga sa Tagoloan,Misamis Oriental.
Kini sa oras nga maduso na ang kasong kriminal batok Almosar sa piskalya ning dakbayan.
Gibutyag ni COCPO spokesperson C/Insp Mardy Hortillosa nga dili mahitabo nga tugutan sa ilang kadagkuan ang pipila ka pulis nga mohimo’g kalihukang ilegal sama sa pagbaligya’g droga.
Si Almosar ang konektado sa Cugman Police Station atol sa pagkadakpi niini sa raiding teams sa Tagoloan ning lalawigan.
Sa pikas bahin,gibutang-butangan tungod sa kasuko hinungdan nga nadakpan si PO2 Arnold Almasor ug live-in partner nga si Grace Salvador nga pulos taga-Brgy Bugo ning syudad.
Kini ang tubag ni Almasor sa ilang pagkasikop atol sa buy bust operation nga gilusad sa PNP raiding team sa ilang hideout sa Tagoloan,Misamis Oriental.
Namugos si Almasor nga dili sila ang tag-iya sa 12 ka sachets sa gitoohang shabu nga gipakita sa kapolisan atubangan sa publiko.
Samtang angay magpasalamat unta ang pulis nga dinakpan nga si Almasor kay kini buhi pa nga nakuha sa kapolisan sulod sa gisak-an niini nga boarding house.
Kini maoy tubag ni Tagoloan Police Station commander C/Insp Albart Tare batok sa pasangil sa suspek nga tumo-tumo lamang ang pasangil ug planted ang shabu nga nakuha gikan kaniya.
Miingon si Tare nga dili mahitabo ang masayop ang kapolisan sa ilang gihimo nga operasyon batok sa mag-live in partner.
Una niini,dungan nga gilusob sa mga personahe sa Drug Enforcement Units sa MisOr PNP;Tagoloan PNP ug Cagayan de Oro City Police Office ang mga suspek hinungdan nga nasikop sa miaging adlaw.
