CAGAYAN DE ORO CITY-Patay ang pulis ug laing usa ka armadong sibilyan sa pinusilay samtang mihimo’g anti-carnapping operation ang PNP-Regional Highway Patrol Group sa Masterson Avenue,Upper Carmen sa syudad.
Miingon si PNP-HPG regional director Sr/Supt Danilo Buentipo nga giila ang namatay nila nga kauban nga si SPO1 Serge de Constantine Maceren samtang samaron usab si SPO2 Lynde Baltazar dihang kalit gipusil sa grupo ni Abdulrahim Adilao,42 anyos,minyo nga nagpuyo sa Pueblo de Oro ,Upper Carmen sa syudad.
Nabantayan sa mga biktima nga improvised plate number ang gigamit sa Hyundai Accent sa mga suspek rason nga gisita ni Maceren apan misugat kaniya ang mga bala sa M4 rifle.
Nakabalos pa si Baltazar hinungdang naigo usab si Adilao ug paspas gipangdala sa magkalahi nga ospital sa Brgy Carmen.
Apan tungod sa grabeng igo ni Maceren napakyas ang mga doktor sa Madonna Child Hospital pagsalbar kaniya hinungdan sa kamatayon niini.
Nakabsan usab sa kinabuhi si Adilao dihang gibalhin sa Northern Mindanao Medical Center gikan sa JR Borja City Hospital tungod sa mga igo sa 9mm pistol gikan kang Baltazar.
Samtang gipaubos usab sa dugang imbestigasyon ang kapikas ni Adilao nga si Joan Gomez aron basehan pagsang-at sa kaso sa piskalya sa syudad sunod semana.
Kini human nakig-pinusilay si Andilao kanila ni Maceren ug Baltazar sa PNP Regional Highway Patrol Group dihang gisita sa Upper Carmen sa syudad.
Miingon si Carmen Police Station deputy commander Insp Tawide Galleon nga may duha ka tawo pa sila nga gipangita nga kauban namusil ni Andilao ngadto kanila ni Maceren ug Baltazar.
Dumduman nga pinakahuli nadakpan nila ni Maceren ang duha ka motorista nga mihatag sa nilibong salapi nga suburno dihang nadakpan sa anti-carnapping operation sa Upper Carmen ning syudad.
