CAGAYAN DE ORO CITY – Gimando ni Police Regional Office 10 Director Brig Gen Rolando Anduyan ang lapad nga imbestigasyon sa pag-ambush sa police corporal sa motorcycle in tandem suspects sa Zone 4,Brgy Del Carmen,Iligan City.
Giila ni PRO-10 spokesperson Lt Col Mardi Hortillosa ang biktima nga si Cpl Nick Pangarongan,hingkod ang panuigon ug nagpuyo sa maong dapit.
Miingon si Hortillosa nga pauli na ang biktima gikan sa iyang trabaho dihang kalit gibanhigan sa wala mailang mga suspek.
Gibutyag sa opisyal nga wala nila wad-a ang posibilidad nga konektado sa iyang trabaho ang rason kon nganong tuyo patyon ang biktima.
Si Pangarongan nga nadestino sa Regional Drug Enforcement Unit-10 sa Camp Alagar ang wala maigo sa duha ka higayong pagpusil ug hinoon nakabalos pa kini hinungdan napugos ang mga suspek sa pagsibat sa miaging gabii.
