Gikabalaka sa pundok sa mga taxi drivers sa syudad nga mutaas na ang kompetisyon sa pagpamasada kung sugdan na sa kompanyang Green GSM Taxi ang ilang operasyon sumala pa sa pahayag ni Bernie Jamaca Presidente sa Cagayan de Oro First Taxi Drivers Alliance o CAFITADA.
Sa interbyu sa Bombo Radyo gipasabot ni Jamaca,nga dako kaayog diperensya ang mahatag maong kompanya sa kompetesyon sa mga drivers tungod kay ang langyawng korporasyon gikan sa Vietnam dunay kapasidad nga mohatag og dakong diskwento ug mga insentibo nga lisod masunod sa mga lokal nga operator.
Nagpasidaan usab si Jamaca nga gikan sa inisyal nga 300 ka units, posibleng moabot pa og 1,500 ka units ang padaganon sa maong langyaw nga kompanya.
Busa, nanawagan ang pundok sa CAFITADA nga hatagag prayoridad ug proteksyon ang mga lokal nga drayber ug operator aron dili maapiki ang ilang panginabuhian batok sa posibleng monopolyo sa mga dayo sa umaabot.
