Giklaro ni Janboy Actub, ang tigpamaba ni City Mayor Rolando Klarex Uy, nga igo lamang nag-implementar sa order gikan sa Office of the Ombudsman ang mayor kalabot sa dismissal order batok kang Barangay Pagatpat Punong Barangay Achilles Jude Babaran.
Dugang pa ni Actub, ang maong direktiba nagagikan pa sa pending nga kaso niadtong tuig 2017 nga wala kaniadto na-serve.
Gumikan sa kamandoan nga kinahanglan kining ipatuman dayon, gihangyo sa mayor ang tabang sa DILG ug city legal office aron mahatod ang order ngadto sa barangay.
Pormal na usab nga milingkod isip bag-ong kapitan ang number one kagawad nga si Jude Fuentes human kini nanumpa atubangan sa mayor.
Bisan pa sa mga istorya sa politika, gipanghimakak ni Actub nga may kalabutan kini sa maong bahin sanglit obligasyon lang sa lokal nga kagamhanan ang pagsunod sa kamandoan gikan sa Ombudsman.
